Ein slóðari farin um sýn

Lisbeth stillaði fyrstu ferð upp til býráðsval í 1984 og gjørdist fyrsta kvinna yvirhøvur, sum varð fólkavald fyri Sambandsflokkin. Henni stóð í boði longu tá at gerast borgarstjóri, men hon tók ikki av fyrr enn í 1992, í ringastu krepputíð. Hon var eisini fyrsti kvinnulig borgarstjóri í Havn. Valið eftir hetta gjørdist metval fyri Sambandsflokkin. 

Lisbeth gjørdist løgtingskvinna í 1990, og sat á tingi í 18 ár, til 2008. Í eitt trý ára skeið var hon forkvinna fyri Sambandsflokkin, og í sama tíðarskeiði varð hon eisini vald á fólkating fyri flokkin.

Lisbeth L. Petersen var dóttir Rakel og Georg Samuelsen, sum var blaðstjóri á Dimmalætting, sum í hennara uppvøkstri var málgagn hjá Sambandsflokkinum. Abbi Lisbeth var Andrass Samuelsen, fyrsti løgmaður Føroya. Politikkur var tí altíð ein týðandi partur av lívinum. 

Hon tók realprógv í Havn í 1955 og studentsprógv á Bagsværd Kostskole og Gymnasium í Danmark í 1958. Hon arbeiddi sum avloysari í ymiskum skrivstovustørvum, eitt nú á advokatskrivstovu í Havn 1960–1970, og var verkætlanarskrivari á ymiskum verkætlanum á Føroya Fornminnissavni 1980–1992. Harumframt var hon floksskrivari Sambandsflokksins frá 1982–1987, og saman við familjuni, var hon størsti einstaki partaeigari í Dimmalætting fram til 2010.

Lisbeth var partur av kvinnupolitiska umhvørvinum í Føroyum í mong ár, og var ein slóðari fyri aðrar kvinnur á politiska pallinum. Í 1992 gjørdist hon fyrsti kvinnuligi borgarstjóri í Tórshavnar kommunu, og í 2001 gjørdist hon eisini fyrsta kvinna, ið er vald á Fólkating at umboða Føroyar. 

Árini 1982-1986 var hon nevndarlimur og næstforkvinna í Kvinnusamskipa Føroya. Tá hon var vorðin løgtingskvinna, helt hon fram við at arbeiða fyri javnstøðumálum. Eitt nú tá hon gjørdist forkvinna í Útnorðurráðnum og fekk í lag ráðstevnu um kvinnupolitisk áhugamál í Føroyum, sum gjørdist grundarsteinurin undir Demokratia-nevndini, sum arbeiðir fyri at økja leiklutin hjá kvinnum í politiskum felagsskapum. Lisbeth sjálv hevði ein stóran leiklut í tilgongdini at stovna Demokratiu.

Lisbeth L. Petersen var mamma Elsu og Georg, og var einkja eftir Jákup Petersen, sum andaðist í 2001. Tey giftust í 1960. Seinastu árini hevur hon búð á ellisheimi og var 85 ára gomul, nú hon fór hiðani. 

Í samrøðu til  greinarøð um kvinnur í politikki, sum kann lesast á heimasíðuni hjá Demokratia, segði Lisbeth L. Petersen í 2014 um sína egnu politisku byrjan, at: 

- Eg hugsaði ofta, at “um hini kunnu, so kann tú eisini.”

Og hon hevði hesi ráðini til tær kvinnur, ið umhugsa at fara uppí politikk.

- Ikki missa mótið, ikki vera bangnar fyri at spyrja onkran, sum veit meira, og ver reiðilig. Erlig. Tað merkir ikki, at ein altíð skal siga alt. Men ikki lúgva.