Enn eitt OL-vónbrot hjá Sverra Sandberg Nielsen

Tað verður eingin føroyingur at síggja í einari OL-finalu í rógving. 

Hóast Sverri Sandberg Nielsen róði seks sekund skjótari í hálvfinaluni, enn hann gjørdi í fjórðingsfinaluni, so rakk tað ikki til eitt pláss í OL-finaluni. 

Sverri endaði á einum fjórða plássi aftan fyri Oliver Zeidler úr Týsklandi, Yauheni Zalaty úr Russlandi og Stefanos Ntouskos úr Grikkalandi. 

Tíðin hjá Sverra Sandberg Nilsen hevði fimtbestu tíðina í báðum hálvfinalunum, so hann róði nóg skjótt til at vera millum seks teir bestu. 

screenshot_2024-08-01_090831.png

Var væl við til tað síðsta

Tá tað restaðu 264 metrar var Sverri Sandberg Nielsen á triðja plássi, men í spurtinum tapti hann til grikkan, ið vann OL-gull í Tokyo. 

"Tá tað restaðu 500 metrar, valdi eg at spurta, men tað gjørdi, at eg ikki hevði nakað eftir í tanganum, tá tað restaðu 100 ella 200 metrar," segði Sverri Sandberg Nielsen við TV2 eftir róðurin. 

"Tað hevur verið eitt hart kappingarár, og eg havi havi ikki havt tað støðið, ið skal til, fyri at koma heilt fram í oddin."

Væl nøgdur við avrikið

Sverri var tó rættiliga avkláraður við sítt avrik í hálvfinaluni. 

"Eg eri nøgdur við tað, ið eg avrikaði. Eg hevði eina góða kenslu í bátinum, men tað var bara ikki nóg gott. Tað var eisini ein hørð hálvfinala, ið eg endaðu í, so eg visti, at tað skuldi nakað eyka til fyri at koma í OL-finaluna." 

Eftir róðurin, so var Sverri Sandberg Nielsen mest irriteraður inná, at hann veit, at hann kann rógva betur enn tað, ið hann hevur víst við OL. 

"Tað er ikki super stuttligt at vita, at mann kann rógva betur enn hetta. Men eg eri heldur ikki super vónbrotin, tí eg havi vitað leingið, at tað fór at blíva torført at koma í OL-finaluna." 

Spurdur, hvat tað er, ið ikki hevur riggað í hesum kappingarárinum, tá hann hevur vitað, at finaluplássið var í vanda, so svaraði Sverri Sandberg Nielsen stutt og greitt: "Onga viðmerking."

Sverri Sandberg Nielsen

Mynd: Ritzau/Scanpix

Nokk síðsta OL

Tað er óvist, um hatta var síðstu ferð, at vit síggja Sverra Sandberg Nielsen í oddinum fyri altjóða rógving. 

"Eg veit ikki ordiliga. Eg skal í øllum førum heim at gera okkurt annað í eina tíð, so fáa vit at síggja. Men eg vænti ikki, at tit síggja meg til eitt OL aftur," ásannaði Sverri Sandberg Nielsen.  

Sverri Sandberg Nielsen

Mynd: Jakob Melgaard

Sára Maria eisini ov stutt

Sára Maria Johansen hevði eisini møguleika at rógva seg í OL-finaluna saman við danska áttaranum, tá tær róðu ein uppafturtøku-riðil fyri at koma í finaluna. 

Um danski OL-áttarin endaði nummar fýra av teimum fimm bátunum í riðlinum, so komu tær í finaluna. Men Sára Maria Johansen og hinar í danska bátinum megnaði ikki at fylgja við hinum fýra bátunum og endaðu sjey sekund aftan fyri italska bátin á fjórða plássi. 

OL-áttarin

Mynd: Jakob Melgaard

Harvið verður eingin danskur bátur at síggja í einari OL-rógvifinalu. Tað verður eisini fyrstu ferð síðani 1992, at eitt dansk rógvilandslið kemur heim aftur frá OL uttan eitt heiðursmerki.