Jóhan og Flensburg ruddiliga omaná ímóti Eliasi og Kiel

Jóhan og Flensburg ruddiliga omaná ímóti Eliasi og Kiel
Jóhan á Plógv Hansen og Flensburg-Handewitt vunnu sín fyrstu grannauppgerð á útivølli ímóti THW Kiel í seks ár
Mynd: dpa  
 
23.03.2024 - 20:31

Jóhan á Plógv Hansen og felag hansara, Flensburg-Handewitt, vóru ruddiliga omaná, tá Elias Ellefsen á Skipagøtu og THW Kiel tóku ímóti í norðurtýsku grannauppgerðini leygardagin.

Spælskiparin á føroyska landsliðnum hevði vunnið heiðurin sum besti ungi hondbóltsspælarin í heiminum dagin fyri, men hvørki hann ella hinir í hvítum fingu gjørt nakað við Flensburg, sum vann stórt, 33-26.

Jóhan á Plógv Hansen skeyt fimm mál upp á heili 10 royndir fyri Flensburg, meðan Elias Ellefsen á Skipagøtu skoraði tríggjar ferðir fyri sebrurnar. 

 

Mugu satsa upp á Champions League

Sigursvanda felagið úr Kiel hevur ikki havt eitt serliga gott kappingarár í Bundesliguni í mun til sístu árini nógvu árini. Kiel vann meistaraheitið í 2020, 2021 og 2023, men eftir tapið í dag er endailiga staðfest, at Elias Ellefsen á Skipagøtu og teir verða ov stuttir í ár.


Elias Ellefsen á Skipagøtu og Kiel hava staðið seg væl í Champions League, og góður møguleiki er fyri at spæla seg í Final4. MYND: Ritzau / Scanpix

 

Í Champions League hevur hinvegin gingið væl higartil. Kiel vann sín bólk í kapping við millum annað Aalborg og PSG og hevur spælt seg í fjórðingsfinaluna, har antin Zagreb ella Montpellier bíða. Eydnast tað at vinna har, skal føroyski hondbóltssnillingurin royna seg í sonevnda Final4-umfarinum í Köln í juni. 

Flensburg er nú á 3. plássi í Bundesliguni, men fýra stig eru upp til Hákun West av Teigum og Füchse Berlin, sum framvegis eru eitt stig frammanfyri Magdeburg. Füchse Berlin tekur ímóti Balingen/Weilstetten sunnudagin.

Er kopiera
Nýggjastu sendingar í ÚV
Leygardag 15. juni
Upp á tá - 150624
176790
Leygardag 15. juni
Jambalaja - 150624
176785
Leygardag 15. juni
EM tíðindi - 150624
176776
Leygardag 15. juni
Vikan 15. juni 2024
176774