Fimm umsóknir til 10 kommunulæknastørv

Fimm umsóknir komu til tey 10 kommunulæknstørvini, sum Heilsutrygd lýsti leys fyri einum góðum mánaði síðan.

Men tveir umsøkjarar lúka ikki krøvini fyri at fáa fast starv, sigur Heilsutrygd.

Heilsutrygd upplýsir annars ikki, hvørji størv søkt er um.

Størvini eru í Vági, á Tvøroyri, tvey eru í Læknahúsinum í Gundadali í Havn, og eitt nýtt starv er í Berjabrekku. Eitt starv er í Kollafirði.

Í Skálafjarðar læknadømi eru tvey størv, tey eru í Heilsudeplinum í Runavík og á Strondum.

Í Fuglafjarðar læknadømi er eitt nýtt kommunulæknastarv leyst at søkja, og eitt nýtt starv er leyst í Læknamiðstøðini við Sandin í Klaksvík 

Heilsutrygd, Gigni í Klaksvík

Heilsutrygd umsitur kommunulæknaskipanina. (Savnsmynd)

Trý nýggj størv

Trý størv eru nýggj.

Eitt er í Berjabrekku í Havn, eitt í Fuglafjarðar læknadømi og í Norðoya læknadømi.

Løgtingið hevur játtað pengar til nýggju størvini.

Í løtuni eru 12 læknar í kommunulæknaútbúgving.

Ásla Janfríð Joensen hevur júst lokið útbúgvingina.

Hon er triði læknin í ár, sum hevur tikið hálvt fimta ára serlæknaútbúgvingina sum kommunulækni.

Tann næsti læknin verður eftir ætlan liðugur 29.februar næsta ár.