Ukraina: Eingin vápnahvíld, meðan russar eru í landinum

Ukraina vísir øllum møguleikum aftur um vápnahvíld við Russland, meðan russiskar deildir eru í Ukraina.

Boðini koma frá ráðgevanum hjá Volodymyr Zelinskyj, forseta, Mykhajlo Podoljak, skrivar Reuters.

Ukrainska stjórnin fer heldur ikki at góðkenna nakra avtalu við Russland, um Ukraina skal lata landaøki frá sær.

Ráðgevin hjá Zelinskyj sigur, at russar gevast ikki við krígnum, um ein vápnahvíld fæst í lag. Kanska verður ein steðgur, men Russland fer at brúka tíðina til at dubba seg bæði við hernaðarligari útgerð og herfólki, sigur hann. 

Ongar friðarsamráðingar

Bæði Russland og Ukraina hava boðað frá, at friðarsamráðingarnar eru hildnar uppat, og russiskar tíðindastovur skriva, at eingin fundur hevur verið millum partarnar síðani 22. apríl.

Russiski herurin roynir nú at taka Donbas har eysturi í Ukraina, har landspartarnir Luhansk og Donetsk eru.

Ein amerikansk frágreiðing vil vera við, at Russland hevur gjørt framstig í økinum, og at landið nú hevur valdið í øllum Luhansk.

Volodymyr Zelenskyj, Ukraina - Mynd: Ritzau Scanpix

Volodymyr Zelinskyj, forseti í Ukraina. (Mynd: Ritzau Scanpix)

Ukraina fer at vinna

Ukrainski forsetin, Zelinskyj, segði í eini sjónvarpsrøðu í gjárkvøldið, at Ukraina væntar framvegis at vinna á Russlandi á vígvøllinum.

Hann viðgongur, at mótstøðan er hørð í Donbas.

Zelinskyj sigur, at endi fæst bara á krígnum við samráðingarborðið.