Fer nú at rykkja Eivind Jacobsen eftir svari

Enn er einki svar komið frá Eivindi Jacobsen, sum fyri kommunuvalið legði Heðin Mortensen undir at spekulera í grundøkjum

Eivind Jacobsen hevur sagt við Vágaportalin, at hann fór at svara eftir kommunuvalið, men enn hava Heðin Mortensen og Jógvan Páll Lassen einki svar fingið

Mynd: Mynd á Facebook-vanga hjá Eivindi Jacobsen

Høgni Djurhuus

07.12.2020 - 10:54

Heðin Mortensen og advokatur hansara, Jógvan Páll Lassen, hava framvegis einki frætt frá Eivindi Jacobsen. Jógvan Páll Lassen sigur, at hann fer at rykkja eftir svari í dag.

Beint fyri kommunuvalið hótti hann við at stevna Eivindi Jacobsen, tí hann á Vágaportalinum legði Heðin Mortensen undir at spekulera í grundøkjum og at fara uttanum lógina, bæði moralskt og juridiskt.

Síðani skrivar Jógvan Páll Lassen í brævinum til Eivind Jacobsen, at um hann skilti hann rætt, legði hann Heðin Mortensen undir at hava fingið vinning burtur úr einari partabrævasølu.

Kunnu hava revsing við sær

Hetta eru skuldsetingar, sum, um tær verða lagdar fyri rættin, hava revsing við sær, skrivaði Jógvan Páll Lassen.

"Eg skal tí siga frá, at um tú ikki alment tekur skuldsetingarnar aftur beinanvegin og biður um umbering fyri skriving tína, verði eg noyddur at leggja málið fyri rættin við kravi um revsing og endurgjald," skrivaði Jógvan Páll Lassen eisini.

Eivind Jacobsen segði við Vágaportalin tá, at hann fór at svara eftir kommunuvalið, sum var 10. november.