Nógv ferðamannaskip koma á Havnina næsta ár

Áhugin hjá stóru ferðamannaskipunum, sonevndu cruiseskipunum, at vitja á Havnini næsta ár er stórur.

Higartil hava 59 skip boðað frá, at tey ætla sær at leggja inn á Havnina í 2021, tá tey eru á ferð í Norðuratlatnshavi, sigur Jónsvein Lamhauge, havnarstjóri.

Men koronukreppan ger støðuna óvissa, og tí ber ikki til at siga, hvussu nógv av skipunm koma.

Okkurt av feløgunum, sum hevur boðað frá vitjan næsta ár, er farið á húsagang, og tí er ikki greitt, um felagið gevst, ella um onkur annar fer at reka felagið víðari, sigur havnastjórin.

Vitja alt árið

Tey 59 skipini, sum hava boðað frá vitjan næsta ár, vitja alt árið, sigur hann.

Í ár skuldu 60 ferðamannaskip vitja á Havnini, men bert tað eina kom, áðrenn korona steðgaði tí virkseminum. Skipið var á Havnini tíðliga í mars.

Hini 59 skipini boðaðu sjálvi frá, at tey kortini ikki komu til Føroya, sigur Jónsvein Lamhauge, havnarstjóri í Tórshavnar Havn.