Staðfest at talan er um rúsevni

Tey komu til Seyðisfjarðar við Norrønu, men vórðu tikin í tollinum, tá tey koyrdu í land. MDMA verður brúkt í Ecstasy pillarum.

Hjúnini, sum eru undir illgruna fyri at hava roynt at smugla 80 kilo av MDMA, eru varðhaldsfongslað til 23. september. Rúsevni vórðu funnin í 14 blikkum, gassfløskum og í reservadekkinum.

Maðurin játtaði, at hann visti um rúsevnini í bilinum. Men kvinnan segði seg einki vita um rúsevnini, skrivar Morgunblaðið.

TAKS váttar samstarv

Sambært myndugleikunum í Íslandi gjørdi samstarv millum løgreglu og tollvaldið í Íslandi og tollvaldið í Føroyum, at hjúnini vórðu tikin, tá tey komu til Íslands úr Hirtshals.

Eyðun Mørkøre, stjóri á TAKS, váttar hesi tíðindi um samstarv fyri Útvarpinum.

Hann kann tó ikki siga, hvør luturin hjá føroyskum tollarum er í stóra íslendska rúsevnismálinum, so leingi íslendska politiið kannar málið.

Norrøna var á Havnini á veg úr Hirtshals til Seyðisfjarðar.