13 ára fongsulsrevsing fyri drápið í Hvalba

Ógvusliga drápið, sum varð framt á 36 ára gamla Hjalmar Holm í einum húsum í Hvalba í fjør, endaði í dag, tá 24 ára gamli Gudmund Trúgvason varð dømdur 13 ára fongsulsrevsing fyri drápið. Har vóru ongar linnandi umstøður. 

Gudmund Trúgvason hevði játtað seg sekan í manndrápi, áðrenn dómur fall í kvøld. 

Bæði yvirlæknin á Psykiatriska deplinum, sum mentalkannaði Gudmund Trúgvason, og danska rættarlæknaráðið eru samd um, at hann er ikki sinnissjúkur, og var tað heldur, tá hann stakk tann sovandi Hjalmar Holm 12 ferðir í hálsin og í ovara part av bringuni.

Visti ikki hví hann drap

Gudmund Trúgvason segði í rættinum í dag, at hann visti ikki, hví hann drap Hjalmar Holm. Hann kendi ikki Hjalmar Holm og kom av tilvild inn í kamarið, har Hjalmar Holm lá og svav. 

Hann vakti Hjalmar Holm, fyri at spyrja hann um sigarettir, men hesin svaraði bara nei.

Síðani fór hann oman aftur í køkin at leita eftir sigarettum.

Óprovokerað dráp

Meðan hann leitar sær hann ein køksknív, sum hann tekur og fer upp aftur á aðru hædd, har hann, sum hann segði, óprovokeraður stakk tann sovandi Hjalmar Holm eftir at hava roynt at vakt hann.

Blaðið á knívunum var 20 sentimetrar og hálvan fimta sentimetur breitt, har sum tað var breiðast. 

Síðani vaskaði Gudmundur Trúgvason sær um hendurnar, hann vaskaði eisini knívin og legði hann á køksborðið, áðrenn hann fór til hús.

Goymdi seg í haganum

Eftir stuttan stegð heima fór hann niðan í hagan, har sum hann legði seg at sova aftan fyri stein.

Pápi hansara fann Gudmund Trúgvason við grótbrotið í Hvalba, og hann fekk tá at vita frá soninum, at hann hevði dripið ein mann, sum hann ikki vísti, hvør var.

Pápin ringdi til Alarmsentralin. Tá var klokkan eitt korter til tólv fyrrapartin leygardagin 9.august í fjør.