Breddin

Nýtt lív er kyknað í kjakið um gomlu bygningarnar í náttúruvøkru Hoydølum.

– Tað skal vera eitt øki, har fólk búgva og virka, ljóðaði boðskapurin frá komandi formanninum í byggi- og býarskipanarnevndini hjá Tórshavnar Kommunu í Degi & Viku í gjárkvøldi:

Komandi býráð ynskir at yvirtaka Hoydalar frá Landsstýrinum, og landsstýrismaðurin í mentamálum tekur væl ímóti ynskinum.

31. mars í 2017 bað Rigmor Dam, táverandi landsstýriskvinna í mentamálum, øll, sum høvdu áhuga og hugflog, um at senda sær uppskot um, hvat bygningarnir í Hoydølum skuldu brúkast til, eftir at gamli Studentaskúlin og HF-Skeiðið flutti í Marknagil.

Almenna bústaðarfelagið Bústaðir fekk tá arkitekta-fyritøkuna Zeta at gera uppskot um eina heildarætlan fyri Hoydalar, sum bæði tekur atlit til náttúruna og brúkar verandi bygningar. Í uppskotinum til Mentamálaráðið skrivar Bústaðir, at tey kunnu fíggja íbúðarpartin fult út.

Tað eydnaðist tó ikki Bústøðum at sannføra landsstýriskvinnuna. Í juli 2018 gjørdi Rigmor Dam av, at Tjóðsavnið og LISA, tað er Listafólkasamband Føroya, skuldu flyta inn í Hoydalar.

Nú politiskt ynski er at brúka økið í Hoydølum til bústaðir, barnagarð og annað, almannagagnligt virksemi, er Bústaðir til reiðar.